پاکستان کے مرکزی بینک نے بڑھتی ہوئی مہنگائی کا حوالہ دیتے ہوئے اعلان کیا ہے کہ شرح سود میں 300 بیسس پوائنٹس کا اضافہ کردیا گیا ہے، جس کے بعد شرح سود 17 فیصد سے بڑھ کر 20 فیصد ہوگئی ہے۔ جو کہ اکتوبر 1996 کے بعد سے اب تک کی سب سے زیادہ شرح سود ہے۔

درج بالا جملے نے جہاں پڑھے لکھوں کو دیوار میں سر مارنے مجبور کیا ہے وہیں، ایک عام شخص کو سر کھجانے پر مجبور کر دیا ہے کہ آیا یہ شرح سود کیا بلا ہے اور اس سے انہیں کیا فرق پڑنے والا ہے۔

ظاہر ہے، ہر کسی کے پاس میکرو اکنامکس میں ڈگری تو نہیں ہوتی، (ہے تو ہمارے پاس بھی نہیں) اس لیے ان بڑے اور اہم حکومتی فیصلوں کو سمجھنا مشکل ہوتا ہے۔

لیکن، خوش قسمتی سے، ہمارے پاس بزنس ریکارڈر ہے اور بزنس ریکارڈر میں ہمارے وہ چیتے ساتھی، جو ان چیزوں میں مہارت رکھتے ہیں، اور ہمیں بھی انہوں نے ہی ہمیں سر کھجانے سے بچا کر سر دیوار میں مارنے پر مجبور کیا۔

بھئی، بھلا یہ تسلیم کرنے میں شرم کیسی کہ ہمیں بھی اس معاملے کو سمجھنے میں مشکل پیش آئی۔

تو معاملہ کچھ یوں ہے کہ، اسٹیٹ بینک آف پاکستان جو پاکستان کا مرکزی بینک ہے، تجارتی بینکوں کو پالیسی بینچ مارک فراہم کرتا ہے، یعنی پالیسی دیتا ہے کہ ایسے اور ان اقدامات کے تحت چلنا ہے۔

آج اسٹیٹ بینک نے شرح سود میں 3 فیصد یا 300 بیسس پوائنٹس (bps) کا اضافہ کیا ہے۔

اس کے تین مطلب ہوں گے اور تینوں ایک دوسرے سے جڑے ہیں۔

ہم نے یہاں اسی مسئلہ کی تھوڑی وضاحت کی ہے۔

سود کی شرح کریڈٹ کارڈز کو بھی متاثر کرتی ہے، اس لیے لوگ اب کسی چیز کی ادائیگی کے لیے اسے نکالنے سے پہلے تھوڑی دیر سوچیں گے۔

یہ کار اور ہاؤس فنانسنگ کے اختیارات جیسی چیزوں کو بھی متاثر کرتی ہے، اس لئے کار لون (گاڑی لینے کیلئے لیا گیا قرضہ) کی زیادہ رقم ادائیگی لوگوں کو گاڑی خریدنے سے روک سکتی ہے۔

اگر لوگ گاڑیاں خریدنے میں ہچکچاہٹ دکھائیں تو قیمتیں کم ہو سکتی ہیں۔

شرح سود اپنے ساتھ جو خطرہ لاتی ہے وہ معیشت کو سست کر رہا ہے۔

خریداروں کی تعداد اس حد تک کم ہو سکتی ہے کہ کوئی اقتصادی سرگرمی (خرید و فروخت) نہیں ہوتی۔ اب بینکوں کو لوگوں کو کم رقم خرچ کرنے کی ترغیب دینے کے ساتھ ساتھ کوئی حل بھی تلاش کرنا ہوگا کہ عوام بالکل ہی خرچ کرنا بند نہ کردیں، ایسا نہ ہو کہ تمام معاشی سرگرمیاں ہی رک جائیں۔

اب جب کہ لوگ پہلے سے ہی بڑھتی ہوئی قیمتوں اور کم تنخواہوں سے خرچہ کم کرنے کے درپے ہیں، دیکھنا یہ باقی ہے کہ کیا جمعرات کو کئے گئے اسٹیٹ بینک کے اعلان سے مہنگائی پر کوئی اثر پڑے گا۔