لاہور ہائیکورٹ نے سپریم کورٹ کے جج کے خلاف پریس کانفرنس کرنے کے معاملے میں چیئرمین ایگزیکٹو کمیٹی پاکستان بار کونسل حسن رضا پاشا کے خلاف توہین عدالت کی درخواست سماعت کے لئے مقرر کردی۔

لاہور ہائیکورٹ کے جسٹس مسعود عابد نقوی 27 فروری کو کیس کی سماعت کریں گے۔

توہین عدالت کی یہ درخواست رانا شاہد ایڈووکیٹ نے دائر کی ہے، جس میں مؤقف اپنایا گیا ہے کہ اعلی عدلیہ کے جج کے خلاف پریس کانفرنس توہین عدالت ہے، آئین اور قانون کے تحت اعلی عدلیہ کے جج کو اسکینڈ لائز نہیں کیا جاسکتا۔

درخواست میں کہا گیا ہے کہ جج کے خلاف پریس کانفرنس انہیں دباؤ میں لانے کا حربہ ہے، چئیرمین ایگزیکٹو کمیٹی کے پاس جج کے خلاف ثبوت تھے تو صدر مملکت یا سپریم جوڈیشل کونسل کو آگاہ کرتے۔

درخواست میں استدعا کی گئی ہے کہ عدالت چیئرمین ایگزیکٹو کمیٹی پاکستان بار کونسل کو طلب کرکے قانونی کارروائی کرے۔