چیئرمین پاکستان تحریک انصاف (پی ٹی آئی) عمران خان کا کہنا ہے کہ چیف الیکشن کمشنر سکندر سلطان راجہ دستور کی پامالیوں میں پی ڈی ایم کا کلیدی معاون ہے۔

ایک بیان میں عمران خان نے کہا کہ عدلیہ کےخلاف گھٹیا پراپیگنڈہ مہم شرمناک ہے، ن لیگ عدلیہ پر یلغار کی تاریخ رکھتی ہے، غیر قانونی فون ٹیپنگ کے ذریعے ججز پر دباؤ ڈالنے کی کوششیں کی جارہی ہیں۔

انہوں نے کہا کہ چیف الیکشن کمشنر دستور کی پامالیوں میں پاکستان ڈیموکریٹک موومنٹ (پی ڈی ایم) کا کلیدی معاون ہے، ہمارےاتحادیوں کوخوفزدہ کرنے کی کوششیں کی جارہی ہیں۔

پی ٹی آئی چیئرمین کا کہنا تھا کہ جیل بھرو تحریک کا اعلان کر چکا ہوں، حقیقی آزادی کے لئے رضاکارانہ طور پر جیلوں کو بھریں گے، بدھ سےگرفتاریاں پیش کرنے کے عمل کا آغاز کر دیں گے۔

سابق آرمی چیف سے متعلق عمران خان کا کہنا تھا کہ جنرل (ر) باجوہ نے اعتراف کیا کہ انہوں نے حکومت تبدیل کی اور نیب ان کے زیر اثر تھا، جنر (ر) باجوہ نے اپنے حلف کی خلاف ورزی کی، وہ کہتے تھے امریکا خوش نہیں۔

ملکی معاشی صورتحال اور فنانس بل کے حوالے سے سابق وزیراعظم نے کہا کہ صدر نے فنانس بل کے آرڈیننس پر دستخط نہ کر کے احسن اقدام کیا، نئے فنانس بل سے مہنگائی کا طوفان آئے گا، ہمارے دور میں ملک میں سرمایہ کاری آ رہی تھی اور دیوالیہ ہونے کا خطرہ صرف 5 فیصد تھا۔