گورنر خیبرپختونخوا حاجی غلام علی نے صوبے میں انتخابات کے انعقاد سے متعلق نگراں وزیراعلیٰ کو خط لکھ دیا، خط میں صوبے میں امن وامان کی صورتحال سے متعلق آگاہ کرنے کا کہا گیا ہے۔

خیبرپختونخوا اسمبلی کے انتخابات کی تاریخ دینے کے معاملے پر لکھے گئے خط میں گورنر خیبرپختونخوا نے نگراں وزیراعلیٰ کو کہا کہ وزیراعلیٰ کی ایڈوائس پر خیبرپختونخوا اسمبلی کو تحلیل کیا، آئین کے مطابق گورنرعام انتخابات کیلئے تاریخ مقرر کرے گا۔

خط میں کہا گیا کہ خیبرپختونخوا میں امن وامان کی تشویشناک صورتحال ہے، انتخابات کیلئے قانون نافذ کرنے والے اداروں کو اعتماد میں لیا جائے اور انتخابات کا پرامن طریقے سے انعقاد یقینی بنایاجائے۔

خط کے متن میں مزید کہا گیا کہ امن وامان کی صورتحال سے متعلق ہمیں آگاہ کیا جائے، صوبے میں پرامن اور شفاف انتخابات چاہتے ہیں۔