ایون فیلڈ اپارٹمنٹس کے باہرشریف فیملی کے خلاف احتجاج کے لیے شہرت رکھنے والے شایان علی مسلم لیگ ن کے قائد نواز شریف کے جوس کی بوتل 3 دن بعد لوٹانے پہنچ گئے۔

شایان کا کہنا ہے کہ یہ جوس نوازشریف مجھے دیکھتے ہی ریسٹورنٹ میں چھوڑ آئے تھے کیونکہ انہیں وہاں سے نکلنے کی جلدی تھی۔

پی ٹی آئی کے سپورٹر شایان نے ٹوئٹرپرویڈیو شیئرکی جس میں وہ ایون فیلڈ اپارٹمنٹس کے مرکزی دروازے پر جوس کی بوتل رکھ کر واپس جارہے ہیں۔

ویڈیو میں شایان کا کہنا ہے کہ، ’میں نوازشریف جیسا چورنہیں ہوں، نواز شریف کیفے میں یہ بھول گئے تھے اور میں یہ واپس کرنے آیا ہوں‘۔

اس سے قبل 10 فروری کو اپنی ٹویٹ میں شایان نے لکھا تھا، ’ نوازشریف ایک کیفے میں بیٹھے تھے جب انہوں نے مجھے دیکھا اور فوراً وہاں سے چل گئے اور اپنا جوس یہیں بھول گئے۔

ٹویٹ کے ساتھ میزپر پڑی جوس کی بوتل کی تصویر شیئرکرنے والے شایان کا کہنا تھا، ’نواز شریف کا ری ایکشن دیکھیں جب انہوں نے مجھے دیکھا تو‘۔

ایک اور ٹویٹ میں شایان کا کہنا تھا کہ نواز شریف کے جانے کے بعد اس نے اسی نشست پر بیٹھ کراسکول کا ہوم ورک مکمل کیا۔