لاہور ہائیکورٹ نے سپریم کورٹ کی حکم کے مطابق ایک ماہ میں تمام اداروں میں اردو زبان کے نفاذ کا حکم دے دیا۔

لاہور ہائیکورٹ کے جسٹس رضا قریشی نے کیس کی سماعت کے بعد اپنے فیصلے میں قرار دیا ہے کہ آئین کے آرٹیکل 251 اور سپریم کورٹ کے فیصلے پرفوری عمل کیا جائے۔

عدالت نے وفاقی اور صوبائی حکومت کو عمل آمد رہوررٹ ایڈیشنل رجسٹرار جوڈیشل کے پاس جمع کرانے کی ہدایت کردی۔

سماعت کے آغاز پر سرکاری وکیل کی مزید مہلت کی استدعا جسے عدالت نے مسترد کر دیا۔

جوڈیشل ایکٹوازم پینل کے سربراہ اظہر صدیق نے دلائل دیتے ہوئے کہا کہ سپریم کورٹ نے ازخود نوٹس لے کر نفاذ اردو کا حکم جاری کر رکھا ہے، کئی سال گزرنے کے باوجود عدالتی حکم پر عمل نہیں کیا جا رہا، عدالت نے ملک بھر کے تمام اداروں، تعلیمی نصاب، سرکاری نوٹیفکیشن اردو زبان میں جاری کرنے کا حکم دیا۔

انہوں نے مزید کہا کہ سپریم کورٹ عدالتی فیصلے بھی اردو میں جاری کرنے کا حکم دے رکھا ہے، نفاذ اردو کے حوالے سے سپریم کورٹ کا یہ فیصلہ آج بھی عمل درآمد کی راہ تک رہا ہے،عدالت فوری طور پر نٍفاذ اردو کے سپریم کورٹ کے فیصلے پر عمل درآمد کا حکم دے-