لاہور ہائیکورٹ کی جانب سے پی ٹی آئی کے 43 اراکین قومی اسمبلی کی رکنیت بحال ہونے پر سابق وفاقی وزیر اسد عمر نے راجہ ریاض کو “لیڈر آف اپوزیشن “کا کمرہ خالی کرنے کا مشورہ دے دیا۔

سماجی رابطے کی ویب سائٹ ٹوئٹر پر اپنے ٹویٹ میں پی ٹی آئی رہنما اسد عمر نے کہا کہ عدالت نے اسپیکر کے سیاسی بنیاد پر کیا گیا فیصلہ معطل کردیا، 43 تحریک انصاف کے ایم این اے کی رکنیت بحال ہو گئی ہے۔

اسد عمر نے مزید کہا کہ راجہ ریاض صاحب لیڈر آف اپوزیشن کا کمرہ خالی کرنے کی تیاری کریں۔

ہر بات کے لئے عدالت جانا کوئی اچھی پارلیمانی روایت نہیں، فواد چوہدری

دوسری جانب فواد چوہدری نے کہا کہ اسپیکر تھوڑا سا جمہوریت کا پاس رکھیں اور لیڈر آف اپوزیشن کو تبدیل کرنے کا نوٹیفکیشن جاری کریں، ہر بات کے لئے عدالت جانا کوئی اچھی پارلیمانی روایت نہیں۔

واضح رہے کہ لاہور ہائیکورٹ نے پاکستان تحریک انصاف کے 43سابق ایم این ایز کے استعفے منظور کرنے کا حکم معطل کردیا ہے ۔

عدالت نے 43 حلقوں میں ضمنی انتخابات روکنے کا حکم دیتے ہوئے الیکشن کمیشن سمیت دیگر فریقین کو نوٹس جاری کرتے ہوئے جواب طلب کرلیا۔