اردن کی وزارت خارجہ نے عمان میں اسرائیلی سفیرکو طلب کرکے اردن کے سفیرکومسجد اقصیٰ میں داخلے سے روکنے پرسخت احتجاج کرتے ہوئے مراسلہ بھیج دیا۔

سعودی خبر رساں ادارے کے مطابق اردن کی وزارت خارجہ کے ترجمان سفیر سنان مجالی کا کہنا ہے کہ اسرائیلی سفیر کو احتجاجی مراسلہ دیا گیا ہے۔

احتجاجی مراسلہ میں تل ابیب میں تعینات اردنی سفیر کو مسجد اقصیٰ کے دورے سے روکنے پر سخت احتجاج کرتے ہوئے اسرائیلی سفیر کو کہا گیا کہ وہ یہ مراسلہ فوری طورپراپنی حکومت کو ارسال کرے۔

احتجاجی مراسلہ کے مطابق مقبوضہ بیت المقدس اورمسجد اقصیٰ کے امور کی تمام ذمہ داری اردن کی ہے ساتھ ہی اس بات پر بھی زور دیا گیا کہ اسرائیل ایک قابض طاقت کے طور پر مقامات مقدسہ بالخصوص مسجد اقصیٰ کے حوالے سے بین الاقوامی قانون کے مطابق اپنی ذمہ داریاں پوری کرے۔

اسرائیل میں انتہا پسند عناصرپرمشتمل حکومت کے قیام کے بعد مسجد اقصیٰ کی بےحرمتی کے واقعات میں بھی اضافہ ہوا ہے۔