جماعت اسلامی کراچی کے امیر حافظ نعیم کی جانب سے آج شام 4 بجے وزیراعلی ہاؤس کے سامنے دھرنا دینے اعلان کیا تھا جس کے پیشِ نظر ساؤتھ پولیس کی جانب سے اطراف میں کنٹینر لگا کر روڈ کو بلاک کردیا گیا ہے۔

کراچی میں پریس کانفرنس کرتے ہوئے حافظ نعیم نے کہا کہ پیپلزپارٹی اور ایم کیوایم انتخابات نہیں چاہتیں اور ایم کیوایم کی ساری توجہ گورنر شپ اور وزارتوں پر ہے۔

امیرِجماعت اسلامی کا کہنا تھا کہ حلقہ بندیوں کی درستگی کیلئے احتجاج بھی کیا تھا لیکن حلقہ بندیوں کی بنیاد پرالیکشن ملتوی نہیں کیا جاسکتا اورمردم شماری میں بھی کراچی کے ساتھ زیادتی ہوئی ہے جبکہ پیپلزپارٹی مردم شماری درست کرنا نہیں چاہتی۔

انہوں نے کہا کہ پیپلزپارٹی اورایم کیوایم نہیں چاہتی کہ بلدیاتی انتخابات ہوں جبکہ ایم کیوایم نے کراچی کیلئے سندھ حکومت سے کچھ نہیں لیا ان کی ساری توجہ گورنر اور وزارتوں پر ہے، گورنرکی تقرری کیلئے پورا ریکارڈ چیک ہونا چاہئے۔

حافظ نعیم الرحمان نے کہا کہ پولیس کا نظام بہتربنانے کی ضرورت ہے سیاسی بنیاد پر بھرتیوں کا سلسلہ بند ہونا چاہئے، پولیس کی معاونت کے بغیرمنشیات کے اڈے نہیں چل سکتے جبکہ رینجرز کو اسٹریٹ کرائم سے متعلق بھی اختیارملنا چاہئے۔