امریکی محکمہ خارجہ کا کہنا ہے کہ پاکستانی عوام نے دہشتگرد حملوں سے شدید نقصان اٹھایا، دہشتگردی کے خلاف دفاع کرنا پاکستان کا حق ہے۔

ترجمان امریکی محکمہ خارجہ نیڈ پرائس کے مطابق پاکستان کی قومی سلامتی کمیٹی کے بیانات سے آگاہ ہیں۔ دہشتگردی کے خلاف دفاع کرنا پاکستان کا حق ہے۔

واشنگٹن میں پریس بریفنگ کے دوران نیڈ پرائس نے کہا کہ افغان طالبان اپنے وعدے پورے نہیں کر رہے، امریکا صورتحال کو مانیٹر کر رہا ہے اور اس حوالے سے ردعمل دیا جائے گا۔

انہوں نے کہا کہ طالبان اپنے وعدوں کو پورا کریں،یقینی بنایا جائے کہ افغان سرزمین دہشتگردی کے لیے لانچنگ پیڈ کے طور پر استعمال نہ ہو۔ ہم جائزہ لے رہے ہیں کہ طالبان کے فیصلوں کے خلاف کیا اقدامات کر سکتے ہیں۔

ترجمان امریکی محکمہ خارجہ نے مزید کہا کہ افغانستان میں خواتین کو کام کی اجازت دینی چاہیے۔