اسلام آباد ہائیکورٹ نے اسلام آباد کے بلدیاتی انتخابات سے متعلق پاکستان تحریک انصاف (پی ٹی آئی) کی انٹراکورٹ اپیل غیرمؤثر قرار دیتے ہوئے حکم دیا کہ وفاقی حکومت اور الیکشن کمیشن انتخابی شیڈول کویقینی بنائیں۔

جسٹس محسن اخترکیانی کی سربراہی میں اسلام آباد ہائیکورٹ کے 2رکنی بینچ نے اسلام آباد میں بلدیاتی انتخابات سے متعلق پی ٹی آئی رہنماعلی نواز اعوان کی انٹراکورٹ اپیل کی سماعت کی،پی ٹی آئی کے وکیل ،الیکشن کمیشن اورلا افسران عدالت میں پیش ہوئے۔

دوران سماعت جسٹس محسن اختر کیانی نے استفسار کیا کہ الیکشن کیوں ملتوی ہوئے؟لوکل باڈیز کا فنڈ ایڈمنسٹریٹر اورسی ڈی اے کیوں استعمال کرے؟اس عدالت نے واضح فنڈ کے استعمال سے روکا تھا ،کیا حکومت بیان حلفی کے ساتھ بلدیاتی انتخابات کی تاریخ دے سکتی ہے؟جو لوگ بلا مقابلہ منتخب ہو چکے کیا انکوبھی ڈی نوٹیفائی کردیا جائے گا؟ لوگوں نے توخاندانوں میں کتنی لڑائیاں کرلی ہوں گی اور اب انتخاب ملتوی ہوگئے۔

ایڈیشنل اٹارنی جنرل نے گزشتہ حکومت کے آرڈیننس کا ذکر کیا تو جسٹس محسن اخترکیانی نے برہمی کا اظہارکرتے ہوئے کہاکہ ایک تو یہ بات قانون سازوں کو سمجھ نہیں آ رہی ، اگرپارلیمنٹ سے معاملات ہینڈل نہیں ہوتے تو وہاں نہ بیٹھیں ، ہم نے آرڈیننس فیکٹری تونہیں بنانی ناں ،اس وقت قومی خزانے سے 50 ساٹھ کروڑروپیہ خرچ ہوچکے ہیں۔

عدالت نےدلائل مکمل ہونے پرتحریک انصاف کی درخوست غیر مؤثر قراردے دی۔