پاکستان تحریک انصاف (پی ٹی آئی) کے رہنما فواد چوہدری کا کہنا ہے کہ سیاست اور جمہوریت عوام کی حمایت کا نام ہے، پنجاب اور کے پی اسمبلیاں جمعہ کو تحلیل کر رہے ہیں۔

لاہور میں میڈیا سے گفتگو کرتے ہوئے فواد چوہدری نے کہا کہ ملک کی 13 پارٹیاں چوں چوں کا مربہ ہیں، ان کے چہرے دیکھیں تو لگتا ہے جسم سے خون ہی ختم ہوگیا۔

ان کا کہنا تھا کہ اسپیکر ہمارے استعفے منظور کرے اور فوری طور پر انتخابات کرائے جائیں، قومی اسمبلی اور صوبائی اسمبلیوں کے ایک ہی دن الیکشن کرائیں۔ ن لیگ الیکشن کمیشن کو اپنے پارٹنر کے طور پر استعمال نہ کرے۔

انہوں نے مزید کہا کہ ن لیگ اور پی ڈی ایم کو بھاگنا نہیں چاہیے، مقابلہ کریں- کبھی آپ الیکشن کمیشن کو آگے کردیتے ہیں، اگر الیکشن کمیشن تیار نہیں ہے تو استعفیٰ دے اور گھر جائے۔