خیبرپختونخواہ کے اضلاع شمالی وزیرستان اور ہنگو میں دو الگ الگ فائرنگ کے واقعات میں 2 خواتین سمیت 6 افراد جاں بحق ہوگئے۔

ہنگو کے علاقے وراستہ میں مسافر وین پر نامعلوم افراد کی فائرنگ سے دو خواتین سمیت تین افراد جاں بحق ہوگئے۔ پولیس کا کہنا ہے کہ فائرنگ میں زخمی اور جاں بحق ہونے والوں کی لاشوں کو اسپتال منتقل کردیا ہے۔

فائرنگ کرنے کے بعد ملزمان فرار ہونے میں کامیاب ہوگئے جس کے بعد پولیس نے سرچ آپریشن شروع کردیا۔

دوسری جانب شمالی وزیرستان کی تحصیل میرعلی میں گاڑی پر نامعلوم افراد کی فائرنگ سے 3 افراد جاں بحق ہوگئے ہیں۔

ذرائع کے مطابق نامعلوم افراد کی فائرنگ سے 3 افراد جاں بحق ہوئے، جن میں سے ایک فرد کی شناخت کرم خان سکنہ خدی کے نام سے ہوئی ہے۔

سرکاری ذرائع نے بتایا کہ باقی دو لاشوں کی تصدیق کا عمل جاری ہے اور فائرنگ کے بعد گاڑی کو آگ لگا دی گئی۔