پاکستان رینجرز سندھ اورپو لیس نے انٹیلی جنس معلومات کی بنیاد پر مشترکہ کارروائی کرتے ہوئے کراچی کے علا قے بلوچ گوٹھ اورنگی ٹاؤن سے لیاری گینگ وار کے انتہائی مطلوب ملزم عبدالباقر عرف رحمان چھوٹو کو گر فتار کر لیا۔

ترجمان سندھ رینجرز کے مطابق پولیس کے ہمراہ مشترکہ کارروائی میں بلوچ گوٹھ سے لیاری گینگ وار کے انتہائی مطلوب ملزم عبدالباقر عرف رحمان چھوٹو کو گرفتار کر کے اس کے قبضے سے اسلحہ وایمو نیشن بھی برآمد کر لیا گیاہے۔

ترجمان رینجرز نے کہا کہ ملزم لیاری کے مختلف تاجروں اور بلڈرز سے بھتہ وصولی اور علاقے میں خوف و ہراس پھیلانے کے لیے ہوائی فائرنگ میں ملوث رہا ہے۔

ترجمان کا کہنا تھا کہ ملزم نے مزید انکشاف کیا کہ وہ لیاری گینگ وار اور راشد چکنا کے لیے منشیات کی خرید و فروخت میں بھی ملوث رہا ہے، ملزم اس سے پہلے بھی کئی بار گرفتار ہو کر جیل جا چکا ہے۔ملزم کے دیگر ساتھیوں کی گرفتاری کے لیے چھاپے مارے جا رہے ہیں۔