وزیر اعظم شہباز شریف ”شرم الشیخ کلائمیٹ امپلیمنٹیشن سمٹ“ میں شرکت کے لیے 7 سے 8 نومبر کو مصر کے شہر شرم الشیخ کا دو روزہ دورہ کریں گے۔

وزیر اعظم کے ہمراہ وزیر خارجہ بلاول بھٹو زرداری اور کابینہ کے دیگر اراکین اور اعلیٰ حکام بھی ہوں گے۔

ترجمان دفتر خارجہ کے مطابق یہ سربراہی اجلاس اقوام متحدہ کی موسمیاتی تبدیلی کے حوالے سے 27ویں کانفرنس (کوپ ۔27) کے ایک حصے کے طور پر ہو رہا ہے۔

وزیر اعظم 8 نومبر کو اپنے نارویجن ہم منصب کے ساتھ ”کلائمیٹ چینج اینڈ سسٹین ابیبلٹی آف ولنرایبل کمیونٹیز“ پر ایک اعلیٰ سطح کے گول میز مباحثے کی شریک صدارت بھی کریں گے۔

وزیر اعظم اعلیٰ سطح کی تقاریب بشمول اقوام متحدہ کے سیکرٹری جنرل کی ایگزیکٹیو ایکشن پلان کے ابتدائی وارننگ سسٹمز کے آغاز کے لیے گول میز میں بطور اسپیکر بھی شرکت کریں گے اور 7 نومبر کو ”مڈل ایسٹ گرین انیشیٹو سمٹ“ میں شرکت کریں گے۔

شہباز شریف سمٹ کی سائیڈ لائنز پر کئی عالمی رہنماؤں کے ساتھ دو طرفہ ملاقاتیں بھی کریں گے۔