سابق وزیراعظم عمران خان کی نااہلی کے فیصلے سے اسٹاک مارکیٹ کو دھچکا پہنچنے کا امکان تھا تاہم اسٹاک مارکیٹ محض ایک ہچکی لے کر سنبھال گئی اور دوپہر کو فیصلہ آنے کے بعد مارکیٹ بند ہونے کے دوران بینچ مارک کے ایس ای 100 انڈیکس 150 پوائنٹ اوپرگیا۔

عمران خان کے خلاف توشہ خانہ ریفرنس کا فیصلہ سنانے کے لیے الیکشن کمیشن آف پاکستان نے دن دو بجے کا وقت مقرر کیا تھا۔ اس وقت تک مارکیٹ میں آدھے دن کا کاروبار پہلے ہی ہو چکا تھا۔ مارکیٹ 42137 پر کھلی تھی اور معمولی اتار چڑھاؤ کے بعد دوپہر 12بجے 42046 پر ٹھہر گئی۔

جیسے ہی الیکشن کمیشن آف پاکستان کی جانب سے فیصلہ سنایا گیا۔ مارکیٹ کو پانچ منٹ کے لیے دھچکا لگا اور انڈیکس گر کر 41000 کی نفسیاتی حد تک پہنچ گیا۔

تاہم پانچ منٹ بعد ہی مارکیٹ کی بحالی شروع ہوگئی ہے اور فیصلہ آنے کے بعد مجموعی طور پر 15 منٹ میں مارکیٹ واپس اپنی سطح پر واپس آگئی۔

دن بھر کی ٹریڈنگ میں مجموعی طور پر مارکیٹ 50 پوائنٹ کے قریب اوپر آئی۔