لاہور ہائیکورٹ راولپنڈی بنچ نے وفاقی وزیر داخلہ رانا ثناء اللہ کے وارنٹ گرفتاری معطل کردیے۔

لاہور ہائی کورٹ راولپنڈی بنچ کے جسٹس صداقت علی خان نے رانا ثناء کی گرفتاری کے خلاف درخواست پر سماعت کی۔

عدالت نے محکمہ اینٹی کرپشن کو وارنٹ گرفتاری پر ہر طرح کی کارروائی سے روک دیا اور اینٹی کرپشن کی تفتیشی ٹیم کو نوٹس جاری کرکے 17 اکتوبر کو کیس کے ریکارڈ سمیت طلب کر لیا ہے۔

وزیرداخلہ رانا ثناءاللہ پر کلر کہار میں نجی سوسائٹی کے مالک سے رشوت میں دو پلاٹ لینے اور غیر قانونی سوسائٹی کی رجسٹریشن کا الزام ہے۔

اس کیس میں بیان ریکارڈ کرانے کے لیے رانا ثناء اللہ کو اینٹی کرپشن ہیڈ کوارٹرز طلب کیا گیا تھا تاہم پیش نہ ہونے پر گزشتہ دنوں ان کے بلا ضمانت وارنٹ گرفتاری جاری کیے گئے تھے۔