وزیراعلیٰ چودھری پرویزالٰہی کا کہنا ہے کہ پنجاب سے کوئی افسر ہماری اجازت کے بغیر واپس نہیں جائے گا، ہماری طرف سے پولیس کو سپورٹ اور ٹھنڈی ہوا آئے گی جو نیچے عوام تک جانی چاہیے۔

دربار ہال سول سیکرٹریٹ میں پولیس کانفرنس سے خطاب کرتے ہوئے وزیراعلیٰ چودھری پرویز الہی نے کہا کہ جی او آر میں افسروں کیلئے رہائشی سہولتوں میں اضافہ کیا جائے گا۔

انہوں نے مزید کہا کہ پنجاب میں 150 پولیس پٹرولنگ پوسٹیں بنائی جائیں گی اور کچے کے علاقے میں سپیشل فورس کو تنخواہ کا خصوصی پیکیج دیا جائے گا۔

پرویز الٰہی کا کہنا تھا کہ ایف آئی آر اور دادرسی کیلئے عوام کو بار بار تھانے جانے کی ضرورت پیش نہیں آنی چاہیے۔

دوسری جانب وزیراعلیٰ پنجاب نے اپنے آفس میں سی سی پی او لاہور غلام محمود ڈوگر سے ملاقات کی۔

پرویز الہیٰ نے سی سی پی او کو کام جاری رکھنے کی ہدایت کی اور کہا کہ آپ نے چارج نہیں چھوڑنا، ہم آپ کو جانے نہیں دیں گے۔