رہنما متحدہ قومی موومنٹ پاکستان (ایم کیو ایم) کشور زہرہ کا کہنا ہے کہ لاپتہ افراد کی واپسی کے حوالے سے ابھی تک کوئی پیشرفت نہیں ہوئی ہے۔

آج نیوز کے پروگرام ‘اسپاٹ لائٹ’ میں گفتگو کرتے ہوئے ایم کیو ایم رہنما نے کہا کہ کارکنان کی واپسی سے متعلق فی الحال کوئی پیشرفت نہیں ہوئی، ہمارے کئی کارکنان ابھی تک لاپتہ ہیں جن کے لواحقین کے لئے صبر کرنا بہت مشکل کام ہوتا ہے۔

کشور زہرہ نے کہا کہ لاشیں ملنا ہمارے لیے نئی بات نہیں، کئی کارکنان کو غائب ہوئے تقریباً 6 سے 10سال ہوگئے ہیں، اگر کارکنان نے جرم کیا ہے تو انہیں عدالتوں میں پیش کیا جائے، امید ہے رانا ثناء اللہ اس پر کام کریں گے۔

اس ضمن میں رہنما پیپلز پارٹی ناز بلوچ کا کہنا تھا کہ لاشیں ملنے پر لواحقین پر بہت بڑا پہاڑ ٹوٹتا ہے، لوگوں کو قومی دھارے میں لانا سیاسی جماعتوں کا ہی کام ہے۔