منڈی بہاؤالدین کے گورنمنٹ چلڈرن اسپتال سے نومولود بچہ اغوا ہوگیا۔

اس حوالے سے بچے کے لواحقین نے بتایا کہ بچے کو سانس کی تکلیف پر سرکاری اسپتال لائے تھے۔

بچہ اغوا کرنے کی سی سی ٹی وی فوٹیج آج نیوز کو موصول ہوگئی، جس میں دیکھا جاسکتا ہے کہ بچے کو اسپتال کی نرسری سے ایک خاتون نے اٹھایا اور اپنے ساتھ لے گئی۔

واقعہ پر سی ای او ہیلتھ اتھارٹی کا کہنا ہے کہ معاملے کی انکوائری کروا رہے ہیں ،غفلت برتنے والوں کے خلاف ایکشن لیں گے۔

دوسری جانب بچہ کی خالہ کا کہنا ہے کہ گارڈز نے بچے کے پاس کھڑے نہیں ہونے دیا، نرسری سے باہر نکال دیا گیا تھا۔

انہوں نے بتایا کہ اسٹاف نے ہم سے کہا کہ آپ نے دو گھنٹے تک آپنے واپس نہیں آنا، جب میں دو گھنٹے بعد واپس آئی تو نہ بچہ موجود تھا نہ ہی اسٹاف موجود تھا۔

انہوں نے بتایا کہ میں نے 15 پر کال کی لیکن اسپتال انتظامیہ نے کوئی سپورٹ نہیں کیا، پولیس نے تفتیش شروع کردی ہے- جو عورت سی سی ٹی وی فٹیج میں بچہ لے جارہی ہے اس کا ہم سے کوئی تعلق نہیں ہے۔