اسلام آباد: الیکشن کمیشن پاکستان (ای سی پی) نے کراچی ڈویژن میں بلدیاتی اور قومی اسمبلی کے 8 حلقوں میں ضمنی انتخابات کے لئے نئی تاریخوں کا اعلان کردیا۔

الیکشن کمیشن کے مطابق کراچی کےتمام اضلاع میں بلدیاتی انتخابات کے لئے پولنگ 23 اکتوبر کو ہوگی جب کہ حیدرآباد ڈویژن میں پولنگ کی تاریخ کا اعلان بعد میں کیا جائے گا۔

الیکشن کمیشن کے مطابق قومی اسمبلی کے 8 حلقوں بشمول این اے 22 مردان، این اے 24 چارسدہ، این اے 31 پشاور، این اے 45 کرم میں ضمنی انتخابات 16 اکتوبر کو ہوں گے۔

ای سی پی نے بتایا کہ این اے 108 فیصل آباد، این اے 118 ننکانہ صاحب، این اے 237 ملیر اور این اے 239 پر بھی ضمنی انتخابات میں پولنگ 16 اکتوبر کو ہوگی۔

اس کے علاوہ الیکشن کمیشن نے 9 اکتوبر کو ہونے والے ضمنی انتخابات کو بھی 16 اکتوبر کو کرانے کا اعلان کردیا ہے۔

ای سی پی کے مطابق 9 اکتوبر کو ضمنی الیکشن کی تاریخ میں عید میلاد النبی کے باعث تبدیلی کی گئی ہے جن میں 3 صوبائی اور ایک قومی اسمبلی کی نشست شامل ہے۔

الیکشن کمیشن کا کہنا ہے کہ این اے 157 ملتان، پی پی 139، پی پی 209 خانیوال اور پی پی 241 میں پولنگ 16 اکتوبر کو ہوگی۔