وزیراعظم شہباز شریف نے 2 کروڑ 10 لاکھ سیلاب متاثرین کے لئے ریلیف کا اعلان کردیا۔

وزیراعظم نے سیلاب متاثرین کے لئے ریلیف کا اعلان کرتے ہوئے کہا کہ متاثرہ علاقوں میں اگست اور ستمبرکے بجلی کے بل نہیں لئے جائیں گے جس کے تحت 2 کروڑ 10 لاکھ صارفین کو ریلیف ملے گا۔

شہباز شریف نے بلوچستان کے شہر صحبت پور کا دورہ کیا جہاں انہوں نے سیلاب سے ہونے والی تباہی کا جائزہ لیا، شہباز شریف کو دوران پرواز سیلاب سے نقصانات و امداد پر بریفنگ دی گئی جب کہ انہوں نے متاثرین کے کیمپس کا دورہ کرکے بچوں سے گفتگو بھی کی۔

میڈیا سے بات کرتے ہوئے وزیراعظم کا کہنا تھا کہ سیلاب سے متاثرہ علاقوں میں وبائی امراض پھیل رہے ہیں جسے کنٹرول کرنا ضروری ہے۔

انہوں نے کہا نے کہا کہ پوری قوم یک جاں ہو کرسیلاب کی تباہ کاریوں کا مقابلہ کر رہی ہے، سیلاب سے سب سے زیادہ نقصان سندھ کو پہنچا ہے، وفاق ہر متاثرہ خاندان کو 25 ہزا ر روپے دے رہا ہے اور اب تک 24 ارب روپے متاثرین میں تقسیم کیے جا چکے ہیں۔

ان کا مزید کہنا تھا کہ سیلاب متاثرہ علاقوں سے اگست اور ستمبر کے بجلی کے بل نہیں لئے جائیں گے، 300 یونٹ والے بجلی صارفین کو بھی فیول ایڈجسمنٹ چارجز کی چھوٹ دی گئی ہے۔

شہباز شریف نے کہا کہ ریلیف سے 2 کروڑ 10 لاکھ صارفین استفادہ حاصل کرسکیں گے جب کہ ستمبر میں بھی 300 یونٹ تک والے صارفین سے فیول ایڈجسمنٹ چارجز وصول نہیں کیئے جائیں گے۔