وفاقی وزیراطلاعات مریم اورنگزیب کا کہنا ہے کہ عمران خان کی آنکھوں پر اقتدارکی ہوس کی پٹی بندھی ہے، وہ پہلے فیصلہ کریں ان کا مسئلہ کیا ہے، بیرونی سازش ؟ حقیقی آزادی ؟ الیکشن کمشنر؟ یا کرپشن کا این آراو؟۔

جاری بیان میں وفاقی وزیراطلاعات نے کہا کہ عمران خان کو سیلاب میں ڈوبا ملک اورلوگ نظرنہیں آرہے ، الیکشن کمشنر نے آخرکیا گناہ کیا ہے؟ 8 سال سے زیرالتوا فارن فنڈنگ کیس میں فیصلہ ہی تو سُنایا ہے ۔

چیئرمین پاکستان تحریک انصاف کوشدید تنقید کا نشانہ بناتے ہوئے انہیں بیمار،کرپٹ،جھوٹا ، انّا پرست اور خود غرض بہروپیا قرار دیتے ہوئے کہا کہ ، “عمران خان صاحب جتنی اوقات ہے اُتنی بات کریں، “کی جائے” اور “کیا جائے” کا وقت ختم ہو گیا”۔

مریم اورنگزیب نے الزام عائد کیا کہ سابق وزیراعظم حقیقی آزادی نہیں بلکہ اپنی حقیقی کرپشن سے این آراوچاہتے ہیں، ان کا مقصد کوئی الیکشن نہیں بلکہ اپنے مقدمات ختم کرانا ہیں، فارن فنڈنگ، فرح گوگی اور بشریٰ بی بی کے لئے این آر او مانگ رہے ہیں۔

انہوں نے مزید کہا کہ عمران صاحب آپ نے الیکشن کمشنر سے کس چیزکی گارنٹی لی تھی؟ امریکہ کے خلاف بیان بازی کرتے ہیں اور امریکی فرم سے امریکہ میں لابی اور برانڈنگ کرواتے ہیں، چھُپ چھُپ کے ملاقاتیں کرتے ہیں۔