سابق وفاقی وزیر اور رہنما پاکستان تحریک انصاف (پی ٹی آئی) فواد چوہدری کے خلاف توہین عدالت کی درخواست کل سماعت کے لئے مقرر کردی گئی ہے۔

اسلام آباد ہائیکورٹ کے جسٹس بابر ستار کل فواد چوہدری کے خلاف درخواست پر سماعت کریں گے۔

وکیل سلیم اللہ خان نے ذاتی حیثیت میں توہین عدالت کی درخواست دائر کی جس کے ساتھ فواد چوہدری کے مختلف بیانات کی ترانسکرپٹ بھی منسلک کی گئی ہیں۔

درخواست کے متن کے مطابق پی ٹی آئی رہنما نے ایڈیشنل سیشن جج زیبا چوہدری کے خلاف توہین آمیز بیان دیا، ایک بیان میں ان کا کہنا تھا کہ عمران خان کو توہین عدالت میں سزا ممکن نہیں کیونکہ وہ ایک مقبول لیڈر ہیں۔

درخواست میں استدعا کی گئی کہ فواد چوہدری کے خلاف توہین آمیز بیانات کی وجہ سے توہین عدالت کی کارروائی کی جائے۔