اسلام آباد کے پاکستان انسٹیٹیوٹ آف میڈیکل سائنسز(پمز) میں ڈاکٹرز کی جانب سے پاکستان تحریک انصاف (پی ٹی آئی) کے رہنما شہباز گل کا ابتدائی طبی معائنہ مکمل کر لیا گیا ہے۔

شہباز گل کا سیچوریشن لیول 97 اور بلڈ پریشر 70ـ110 ریکارڈ کیا گیا ہے، شہباز گل کو بخار کی شکایت بھی نہیں ہے جبکہ ان کا کورونا ٹیسٹ کا نمونہ بھی لیبارٹری بھجوا دیا گیا ہے۔

پمز ذرائع کے مطابق میڈیکل بورڈ کی ابتدائی رپورٹ میں شہباز گل کی صحت کو تسلی بخش قرار دے دیا گیا ہے، پمز کے کارڈک سینٹر میں شہباز گل کا طبی معائنہ کیا گیا، میڈیکل بورڈ نے اڑھائی گھنٹے سے زائد وقت میں طبی معائنہ مکمل کیا۔

مزید پڑھیں: پی ٹی آئی رہنما شہباز گل اسلام آباد سے گرفتار، بغاوت کا مقدمہ درج

شہباز گل کی تمام ٹیسٹ رپورٹس موصول ہونے کے بعد اسپتال میں رکھنے یا ڈسچارج کرنے کا فیصلہ کیا جائے گا۔

پمز میں پی ٹی آئی کے رہنما اعجاز چوہدری نے شہباز گل سے ملاقات کے بعد میڈیا سے گفتگو کرتے ہوئے کہا کہ شہباز گل کے کمرے کو پولیس نے گھیر رکھا ہے، اندر کوئی اور مخلوق کے لوگ بھی موجود ہیں، چیف جسٹس سے اپیل کرتا ہوں کہ نوٹس لیں۔

مزید پڑھیں: شہباز گل کی گرفتاری پر پی ٹی آئی کا عدالت سے رجوع کرنے کا فیصلہ

اس موقع پر پی ٹی آئی کی رہنما ملیکہ بخاری نے بھی پمز کا دورہ کیا۔

‘شہباز گل کی جان کو شدید خطرہ ہے’

وزیر داخلہ پنجاب کرنل (ر) ہاشم ڈوگر نے کہا ہے کہ شہباز گل کی جان کو شدید خطرہ ہے۔

صوبائی وزیر داخلہ ہاشم ڈوگر نے سماجی رابطے کی ویب سائٹ ٹوئٹر پر اپنے بیان میں کہا ہے کہ ‏اسلام آباد پمز اسپتال میں شہباز گل اس وقت تشویش ناک حالت میں ہے، ان کو نزدیکی اسپتال میں بھیجنے کا ہمارا فیصلہ ٹھیک تھا۔

اسلام آباد پمز ہسپتال میں شہباز گل اس وقت تشویش ناک حالت میں ہے اللہ پاک ان زندگی دے۔ اس سے ثابت ہوتا ہے کہ ان کو نزدیکی ہسپتال میں بھیجنے کا ہمارا فیصلہ ٹھیک تھا۔

— Col (R) Muhammad Hashim| Home Minister Punjab. (@ColhashimDogar) August 17, 2022

انہوں نے کہا کہ سب کو علم ہے کہ شہباز گل کو اسلام آباد پولیس کی نگرانی میں شدید تشدد کا نشانہ بنایا گیا ،جب پنجاب پولیس نے جیل ڈاکٹر کی ہدایت کی پر اسے نزدیکی اسپتال شفٹ کرنے کی کوشش کی تو اسلام آباد پولیس نے رینجرز کی زیر نگرانی میں بدمعاشی کرتے ہوے شہباز گل کو اسلام آباد شفٹ کیا،جس پران کی حالت تشویش ناک ہوئی۔

جب پنجاب پولیس نے جیل ڈاکٹر کی ہدایت کی روشنی اس کو نزدیکی ہسپتال شفٹ کرنے کی کوشش کی تو اسلام آباد پولیس نے مکمل بدمعاشی کرتے ہوے رینجرز کی زیر نگرانی اسلام آباد شفٹ کیا ہے جہاں اس کی جان کو شدید خطرہ ہے۔ میری معزز اعلی عدالتوں سے انسانی حقوق کی خاطر مداخلت کی اپیل ہے

— Col (R) Muhammad Hashim| Home Minister Punjab. (@ColhashimDogar) August 17, 2022

وزیر داخلہ پنجاب نے مزید کہا کہ معزز اعلیٰ عدالتوں سے اپیل ہے کہ وہ انسانی حقوق کی خاطر مداخلت کریں ۔

گزشتہ روز تحریک انصاف کے گرفتار رہنما شہباز گل کو اڈیالہ جیل انتظامیہ نے کئی گھنٹے تاخیر کے بعد اسلام آباد پولیس کے حوالے کیا تھا۔

جیل انتظامیہ کا شہباز گل کو اسلام آباد پولیس کو حوالے نہ کرتے ہوئے کہنا تھا کہ اڈیالہ جیل ایک حساس مقام ہے یہاں ہجوم نہ لگایا جائے، رات تک جیل کی حدود میں غیر متعلقہ اہلکاروں کا موجود ہونا خطرناک صورتحال کا باعث ہوسکتا ہے۔

اس سے قبل اسلام آباد کی ایڈیشنل سیشن جج زیبا چوہدری نے پی ٹی آئی رہنماشہبازگل کا مزید2 روزہ جسمانی ریمانڈ منظور کرتے ہوئے انہیں 48 گھنٹے کے لیے پولیس کے حوالے کیا تھا ۔

تاہم طبیعت ناسازی کے باعث جیل انتظامیہ نے ملزم کو وفاقی پولیس کے حوالے کرنے سے معذرت کی تھی۔

کیس کا پس منظر

سابق وزیراعظم عمران خان کے چیف آف اسٹاف کو ٹی وی ٹاک شو میں ریاستی اداروں کےسربراہان کے خلاف بیانات کے الزام میں 9 اگست کو بنی گالا کے قریب سے گرفتار کیا گیا تھا۔

شہبازگل کے خلاف تھانہ بنی گالا میں سٹی مجسٹریٹ کی مدعیت میں بغاوت کا مقدمہ درج کیا گیا، ایف آئی آر میں اداروں اور ان کےسربراہوں کے خلاف اکسانے سمیت دیگر دفعات شامل ہیں۔