وفاقی وزیر برائے منصوبہ بندی احسن اقبال نے کہا کہ بھارت کی جانب سے کشمیر کی حیثیت بدلنے پر عمران خان نے کچھ نہیں کیا۔

اسلام آباد میں نیوز کانفرنس کرتے ہوئے احسن اقبال نے کہا کہ عمران خان نے چین پاکستان اقتصادی راہداری (سی پیک) منصوبہ روکا، پی ٹی آئی دور میں اُدھر ایک منصوبہ نہیں لگا جب کہ بھارت کی جانب سے کشمیر کی حیثیت تبدیل کرنے پر بھی عمران خان کچھ نہ کرسکے۔

انہوں نے کہا کہ عمران خان نے سیلاب متاثرین کے سر پر ہاتھ تک نہیں رکھا، خیبرپختونخوا میں بھی سیلاب سے بدترین تباہی پھیلی ہوئی ہے لیکن انہیں کوئی فکر نہیں۔

وفاقی وزیر نے مزید کہا کہ عمران خان نے اداروں کے خلاف مہم چلائی، یہ ملکی خزانہ خالی کرکے گئے لیکن شہباز شریف نے مشکل فیصلےکر کے معیشت کو بچایا۔

لیگی رہنما نے کہا کہ پی ٹی آئی چیئرمین نے فارن اور ممنوعہ فنڈنگ لی ہے، اگر عمران خان اتنے شفاف تھے تو معاملے کو 8 سال طول نہ دیتے۔