وزیرمملکت برائے پیٹرولیم مصدق ملک نے کہا ہے کہ عارف نقوی عمران خان کا 25 سال پرانا دوست ہے اور انہیں پیسے دیتا ہے، ایک شخص کو امریکی عدالت سے 290 سال کی سزا کا عندیہ دیا جارہا ہو اور کوئی شخص اس کا گارنٹر ہو تو کیا وہ صادق و امین ہے۔

اسلام آباد میں نیوز کانفرنس کرتے ہوئے مصدق ملک نے کہا کہ کیا 250 ملین ڈالر کی منی لانڈرنگ کو تحفظ دینے والا صادق و امین ہے؟

ان کا کہنا تھا کہ لوگ کہتے ہیں عمران خان کا ذریعہ معاش نہیں، لیکن 2012 میں عمران خان نے کہا کہ عارف نقوی ہمیں پیسے دیتے ہیں۔

مصدق ملک نے کہا کہاقتدار میں آنے کے چند دنوں بعد عارف نقوی وزیراعظم کے ساتھ وزیراعظم ہاؤس میں بڑے معاشی معاملے پر بات چیت کرتے نظر آئے، عارف نقوی کو منی لانڈرنگ پر 290 سال کی سزا دینے کا عندیہ ہے، ایک شخص ایسے جرائم کررہا ہو جس کی سزا 290 سال بنتی ہے وہ وزیراعظم ہاؤس میں بیٹھا تھا۔