اسلام آباد:مسلم لیگ (ن) کی سینئر رہنماء مریم نواز نے توشہ خانہ ریفرنس میں احتساب عدالت اسلام آباد سے ایک بار پھر التواء مانگ لیا۔

احتساب عدالت کے جج اصغرعلی نے مریم نواز کی توشہ خانہ ریفرنس میں دائر درخواست پر سماعت کی،نیب پراسیکیوٹر وسیم جاوید اور مریم نواز کے وکیل قاضی مصباح عدالت کے روبرو پیش ہوئے۔

مریم نواز نے درخواست پر ایک بار پھر التواء مانگ لیا، وکیل مریم نواز نے عدالت کو بتایا کہ نیب کا نیا قانون آج یا کل آ رہا ہے، امید ہے کہ ایک دو دنوں میں نیب کا نیا قانون آ جائے گا، نیب کا نیا قانون آنے تک سماعت ملتوی کر دی جائے۔

عدالت نے استدعا منظور کرتے ہوئے کہا کہ جب گزٹ کاپی آجائے گی پھر اس درخواست کو دیکھے گے ، احتساب عدالت نے سماعت 17اگست تک ملتوی کر دی۔