اسلام آباد:الیکشن کمیشن نے پاکستان تحریک انصاف کے چیئرمین عمران خان اور رہنماء اسد عمر کو جرمانے سے متعلق کیس میں اپیل پر دلائل دینے کیلئے آخری موقع دے دیا۔

چیف الیکشن کمشنر سکندر سلطان راجہ کی سربراہی میں 3 رکنی کمیشن نے سابق وزیراعظم عمران خان اور تحریک انصاف کے رہنماء اسد عمر کو جرمانے سے متعلق کیس سماعت کی۔

عمران خان اوراسد عمر کے معاون وکیل نے سماعت پر اعتراض اٹھاتے ہوئے کہا کہ معاملہ اسلام آباد ہائیکورٹ میں زیرالتواء ہے، ہائیکورٹ نے الیکشن کمیشن کو کوئی سخت فیصلہ کرنے سے روکا ہوا ہے۔

چیف الیکشن کمشنر نے کہا کہ ڈی ایم او کے جرمانے کیخلاف اپیل اوراسلام آباد ہائیکورٹ کے کیس کا کیا تعلق ہے؟دونوں زیرسماعت کیسز مختلف ہیں، الیکشن کمیشن آپ کوسزا تو نہیں دے رہا جو ہائیکورٹ کا حوالہ دے رہے ہیں، الیکشن کمیشن جرمانے کیخلاف اپیل منظوریا مسترد کرے گا۔

سکندر سلطان راجہ نے مزید ریمارکس دیئے کہ آج اپیل واپس لے لیں توالیکشن کمیشن معاملہ ختم کردیتا ہے، آج کے آرڈر میں بھی لکھیں گے کہ اسلام آباد ہائیکورٹ اورالیکشن کمیشن کا معاملہ الگ ہے، کمیشن کئی بار کہہ چکا ہے کہ ہائیکورٹ کیس کے باعث معاملہ لٹکا نہیں سکتے۔

الیکشن کمیشن نے اسد عمراورعمران خان کو اپیل پردلائل دینے کیلئے آخری موقع دے دیا۔

چیف الیکشن کمشنر نے ریمارکس دیئے کہ آئندہ سماعت پر دلائل نہ دیئے گئے تو فیصلہ سنا دیں گے، الیکشن کمیشن نے دن رات حلقہ بندیوں کے کیس سننے ہیں۔

بعدازاں الیکشن کمیشن آف پاکستان نے کیس کی مزید سماعت 21 جون تک ملتوی کردی۔