اسلام آباد: وفاقی حکومت نے سابق وزیراعظم عمران خان کیخلاف سپریم کورٹ میں توہین عدالت کی درخواست دائر کردی جبکہ عدالت عظمیٰ نے درخواست پر سماعت کیلئے لارجر بینچ تشکیل دے دیا ۔

سپریم کورٹ میں عمران خان کیخلاف توہین عدالت کی درخواست وفاقی حکومت کی جانب سے اٹارنی جنرل نے دائرکی ۔

عمران خان کیخلاف وفاق کی توہین عدالت کی درخواست#AajNews #imrankhanPTI pic.twitter.com/kYRovU0m5S

— Aaj News (@Aaj_Urdu) May 26, 2022

وفاقی حکومت کی جانب سے دائر درخواست میں کہا گیا ہے کہ عدالت کے حکم کے باوجود عمران خان نے اپنے کارکنان کو ڈی چوک بھیجا۔

درخواست میں کہا گیا ہے کہ سیکیورٹی انتظامات کے رد و بدل کے بعد پی ٹی آئی ورکرز نے سرکاری املاک کو نقصان پہنچایا، فائر بریگیڈ کی کروڑوں روپے مالیت کی گاڑیوں کو نقصان پہنچایا گیا۔

وفاقی حکومت کی جانب سے سپریم کورٹ سے استدعا کی گئی ہے کہ انصاف کے تقاضوں کو مدنظر رکھتے ہوئے چیئرمین تحریک انصاف کیخلاف توہین عدالت کی کارروائی کی جائے۔

ادھر سپریم کورٹ نے عمران خان کیخلاف توہین عدالت کی درخواست پرلارجر بینچ تشکیل دے دیا۔

عدالت عظمیٰ کا 5 رکنی لارجر بینچ چیئرمین پی ٹی آئی کیخلاف توہین عدالت کی درخواست پر سماعت آج ساڑھے 11 بجے کرے گا۔