اسلام آباد: سابق وزیرداخلہ شیخ رشید کا کہنا ہے کہ ڈی جی آئی ایس پی آر کا بیان فوج کے اندر کی سوچوں کی ترجمانی کرتا ہے۔

عوامی مسلم لیگ کے سربراہ شیخ رشید نے سماجی رابطے کی ویب سائٹ ٹوئٹر پرکہا کہ چھٹی مرتبہ ڈی جی آئی ایس پی آر نے کہا ہے کہ فوج کو سیاست میں نہ گھسیٹیں، ڈی جی آئی ایس پی آر کا یہ بیان فوج کے اندر کی سوچوں کی ترجمانی کرتا ہے۔

شیخ رشید نے کہا کہ بلاول بھٹو کو ایک وزیر مارشل لا ء کی دھمکی دیتا ہے جو ایک بھونڈا مذاق ہے۔

#امپورٹڈ_حکومت_نامنظور pic.twitter.com/8VBiZa7IhW

— Sheikh Rashid Ahmed (@ShkhRasheed) May 13, 2022

سابق وزیرداخلہ کا کہنا تھا کہ نواز شریف، آصف زرداری اور مریم نواز نے فوج کو نشانے پر رکھا ہوا ہے، اسٹاک ایکسچینج بیٹھ رہی ہے، ریزرو آدھے رہ گئے ہیں، ڈالر 200 روپے کا ہونے جا رہا ہے، ملک ڈیفالٹ بھی ہو سکتا ہے۔

شیخ رشید کا مزید کہنا تھا کہ ایک ہی حل ہے عبوری حکومت بنائی جائے اور الیکشن کرائے جائیں، ورنہ ملک سری لنکا کے حالات کی طرف جاسکتا ہے، پھر کسی کے ہاتھ کچھ نہیں آئے گا اور جھاڑ پھر جائے گا۔