لاہور: وزیراعظم شہباز شریف نے کہا کہ کپتان اپنی ٹیم کے بغیر کچھ نہیں کرسکتا، احتساب کی آڑمیں افسران کوہراساں کرکےکارکردگی متاثرکرنےکی کوشش کی گئی۔

وزیراعظم شہباز شریف سے لاہور میں سابق و موجودہ سول انتظامیہ کے افسران نے ملاقات کی جس میں افسران نے وزیراعظم کو گورننس، انتظامی امور اور پالیسیوں نفاذ کےحوالے سےآگاہ کیا۔

وزیراعظم نے افسران کو عید کی مبارکباد پیش کرتے ہوئے کہا کہ پاکستان کی خوش قسمتی ہےکہ آپ جیسےافسران موجود ہیں، افسران حکومت کی ملکی ترقی اور خوشحالی میں رہنمائی کرتے ہیں بلاشبہ آپ ملک کا قیمتی اثاثہ ہیں۔

انہوں نے مزید کہا کہ کپتان اپنی ٹیم کےبغیر کچھ نہیں کرسکتا، منصوبوں کا پایہ تکمیل تک پہنچانا افسران کی محنت کا نتیجہ ہے، احتساب کی آڑمیں افسران کوہراساں کرکےکارکردگی متاثر کرنے کی کوشش کی گئی، قومی خدمت ہمارانصب العین ہے اور اس میں کوئی کوتاہی قبول نہیں کی جائے گی۔