لاہور:آئی جی پنجاب راؤ سردار نے وزیراعلیٰ پنجاب عثمان بزدار کو میاں چنوں واقعے کی ابتدائی رپورٹ پیش کر دی۔

رپورٹ میں بتایا گیا ہے کہ واقعے میں 33 نامزد اور 300 نامعلوم افراد کیخلاف مقدمہ درج کیا گیا، مقدمے میں سنگین جرائم اور دہشت گردی کی دفعات شامل کی گئی ہیں۔

آئی جی پنجاب کی رپورٹ میں کہا گیا ہے کہ 120 سے زائد چھاپے مار کر62 مشتبہ افراد کو زیر حراست لیا گیا، زیر حراست مشبہ افراد میں مرکزی ملزمان بھی شامل ہیں۔

وزیراعلیٰ پنجاب کو پیش کی گئی رپورٹ میں کہا گیا ہے کہ مزید افراد کی گرفتاری کے لیے پولیس چھاپے جاری ہیں۔

دوسری جانب وزیراعلیٰ پنجاب عثمان بزدار نے اس معاملے میں انصاف کے تمام تقاضے پورے کرنے کی ہدایت کرتے ہوئے کہا کہ کسی کو قانون ہاتھ میں لینے کی اجازت نہیں دی جا سکتی۔