وزیر خارجہ شاہ محمود قریشی کہتے ہیں افغانستان کی بدلتی ہوئی صورتحال کے تناظر میں عالمی برادری کو موثر اقدامات اورعملی سوچ اختیار کرنی ہوگی۔

ہفتے کے روز اسلام آباد میں وزیر خارجہ شاہ محمود قریشی اور برطانوی وزیر خارجہ ڈومینک راب کے درمیان ملاقات ہوئی۔

ملاقات میں دو طرفہ تعلقات کے تناظر میں اس بات پراتفاق کیا گیا کہ پاکستان اور برطانیہ کے مستحکم دو طرفہ تعلقات میں خصوصاً معیشت اور تجارت کے شعبوں میں مزید اضافہ کیا جائے گا۔

ملاقات میں افغانستان کی تازہ ترین صورتحال،پاک برطانیہ دو طرفہ تعلقات اور باہمی دلچسپی کے امور پر بھی تبادلہ خیال کیا گیا۔

شاہ محمود قریشی نے انسانی ضرورتوں کو پورا کرنے اور پناہ گزینوں کے کسی بھی بحران سے بچنے کےلئےافغانستان میں معاشی استحکام یقینی بنانے پر زور دیا۔

انہوں نے کہاافغانستان کی بدلتی ہوئی صورتحال کے تناظر میں عالمی برادری کو موثر اقدامات اورعملی سوچ اختیار کرنی ہوگی۔

انہوں نے کہا افغان عوام کےلئے معاشی امداد اور جنگ زدہ ملک کی تعمیر نو کےلئے تعاون کی فراہمی نہایت ضروری ہے۔

ریڈیو پاکستان