لاہور:وزیراعلیٰ پنجاب کی معاون خصوصی فردوس عاشق اعوان کا کہنا ہے کہ تاریخ پر تاریخ دینے والوں کا اپنا مستقبل تاریک ہے ،اپوزیشن استعفے دینے کے معاملے پر ڈر چکی ہے، پی ڈی ایم کے پاس اب بیچنے کیلئے کوئی منجن باقی نہیں۔

وزیراطلاعات پنجاب فردوس عاشق اعوان نے اپنے بیان میں کہا کہ پی ڈی ایم کی منفی سیاست کو عوام نے آر پار کردیا ہے، اپوزیشن استعفے دینے کے معاملے پر ڈر چکی ہے اور جو ڈر گیا وہ مر گیا، انہیں علم ہے کہ استعفے دیئے تو خالی نشستوں پر الیکشن ہوں گے۔

فردوس عاشق نے کہا کہ شہزادہ اور راجکماری کبھی بھی مولانا کے کہنے پر اپنے پاؤں پر خود کلہاڑی نہیں ماریں گے، اس ٹولے کی حالت قابل رحم ہے۔

وزیراعلیٰ کی معاون خصوصی نے مزیدکہا کہ بندگلی میں پھنسی ہوئی اپوزیشن کو اب فیس سیونگ بھی نہیں ملے گی، کورونا میں عوام کو تنہا چھوڑنے والے اب خود مارے مارے پھر رہے ہیں۔