پہلگام، مقبوضہ کشمیر میں سیاحوں پر حملے پر حسبِ روایت ہندوستانی میڈیا نے من گھڑت اور جھوٹا پروپیگنڈا جاری کردیا۔ ذرائع کا کہنا ہے کہ آج سہ پہر پہلگام، مقبوضہ کشمیر میں سیاحوں پر مبینہ حملہ ہوا۔ دہشت گردانہ حملے میں 25 سیاح ہلاک اور 10 زخمی ہوئے۔ بھارت فوج نے اپنی ناکامی چھپانے کیلئے ملبہ مجاہدین پر ڈال دیا۔ پاکستانی عوام نے ہندوستانی پروپیگنڈے کو مسترد کر دیا۔

سری نگر کے نواحی علاقے میں فائرنگ کے دوران 25 سیاح ہلاک اور10 زخمی ہوئے۔ بایسران میں سیاحتی ریزورٹ پر 5 منٹ تک فائرنگ کی گئی۔ حملہ آور فائرنگ کرتے رہے، بھارتی فوج اور پولیس سوتی رہی۔

ذرائع کا کہنا ہے کہ ہندوستانی میڈیا اور بالخصوص را سے جڑے سوشل میڈیا اکاؤنٹس نے حملے کے فوری بعد پاکستان کے خلاف زہر اُگلنا شروع کر دیا، حملے میں مذہب کا استعمال کرتے ہوئے غیر مسلموں کو نشانہ بنانے کا ڈرامہ بھی کیا گیا۔

ذرائع نے بتایا کہ بھارت روایتی طور پر کسی غیر ملکی سربراہ کے دورے یا اہم موقع پر، فالس فلیگ کا ڈرامہ رچا کر دنیا کی توجہ مقبوضہ کشمیر میں بھارتی حکومت کے قابو سے باہر سیکورٹی حالات سے ہٹانا چاہتا ہے۔

ذرائع کے مطابق یہ محظ اتفاق نہیں کہ مقبوضہ کشمیر میں سیاحوں پر مُبیّنہ حملہ اُس وقت کیا گیا جب امریکی نائب صدر بھی ہندوستان کا دورہ کر رہے ہیں۔

ذرائع کا یہ بھی کہنا ہے کہ اس سے پہلے بھی مودی حکومت سیاسی فائدہ حاصل کرنے اور اپنی ناکامیوں پر پردہ ڈالنے کے لئے متعدد بار فالس فلیگ آپریشن کا ڈرامہ رچاتی رہی ہے، بھارتی حکومت اور بھارتی فوج مقبوضہ کشمیر میں اپنی ظالمانہ پالیسیوں کی بدولت مکمل طور پر ناکام ہو چکی ہیں۔

پاکستانی عوام نے ہندوستانی پروپیگنڈے کو مسترد کردیا

پاکستانی عوام نے ہندوستانی پروپیگنڈے کو مسترد کر دیا، پاکستان میں انڈین فالس فلیگ اپریشن سوشل میڈیا پر ٹاپ ٹرینڈ بن گیا۔

پاکستانی سوشل میڈیا صارفین ہندوستانی میڈیا کے جھوٹے پروپیگنڈا کو بے نقاب کر رہے ہیں، ٹاپ ٹرینڈ میں ہزاروں پاکستانی اکاؤنٹ حصہ لے رہے ہیں۔

جلیل عباس جیلانی کا بیان

جلیل عباس جیلانی نے کہا ہے کہ بھارت مقبوضہ کشمیر سے دنیا کی توجہ ہٹانا چاہتا ہے، ہم بھارت کے فالس فلیک آپریشن کی مذمت کرتے ہیں، فالس فلیگ آپریشن کا مقصد جدوجہد کشمیر کو بدنام کرنا ہے۔

سابق سیکریٹری خارجہ نے کہا کہ جب بھی بھارت میں کچھ ہوتا ہے الزام پاکستان پر لگاتا ہے، بھارت بغیرثبوت پاکستان پر الزام لگا دیتا ہے، بھارت انگلیاں اٹھانے کے بجائے واقعات کی تحقیقات کروائے، بھارتی ایجنسیاں ایسے واقعات میں ملوث رہی ہیں۔