بھارتی دارالحکومت دہلی میں ایک عدالتی کمرہ اس وقت پرتشدد ہو گیا، جب ایک چیک باؤنس کے کیس میں سزا یافتہ ملزم نے اپنے خلاف فیصلہ سنائے جانے پر وکیل کے ہمراہ خاتون جج کو باہر ملنے کی دھمکی دی۔

بھارتی میڈیا رپورٹس کے مطابق یہ معاملہ جوڈیشل مجسٹریٹ (این آئی ایکٹ) شیوانگی منگلا کے سامنے پیش آیا، جنہوں نے ملزم کو 2 اپریل کو چیک باؤنس کیس میں نیگوشی ایبل انسٹرومنٹ ایکٹ کی دفعہ 138 کے تحت مجرم قرار دیا تھا اور اسے ضمانتی مچلکے فراہم کرنے کا حکم دیا تھا۔

رپورٹ کے مطابق خاتون جج کی جانب سے سزا کے فیصلے پر مجرم بھڑک گیا یہاں تک کہ اس نے مبینہ طور پر جج پر کچھ پھینکنے کی کوشش کی۔ اس نے اپنے وکیل سے کہا کہ وہ اس فیصلے کو تبدیل کرنے کے لیے جو کچھ بھی کرسکتے ہیں وہ کریں۔

بھارتی عدالت کا ’لَو میریج‘ کرنے والے جوڑوں کو تحفظ دینے سے انکار

مذکورہ شخص نے خاتون جج کو دھمکاتے ہوئے کہا کہ “ تو ہے کیا چیز تو باہر مل پھر دیکھتے ہیں کہ کیسے زندہ گھر جاتی ہے۔“

بھارتی میڈیا کے مطابق جج نے بتایا کہ ملزم اور اس کے وکیل اتل کمار نے صرف دھمکیاں ہی نہیں دیں بلکہ انہیں عہدہ چھوڑنے پر بھی روز دیا۔ تاہم انہوں نے پیچھے ہٹنے سے انکار کیا اور کہا کہ وہ انصاف کو یقینی بنانے کے لیے قانونی کارروائی ضرور کریں گی۔

بھارتی سپریم کورٹ کا ’اُردو‘ کے حق میں بڑا فیصلہ

ملزم کے وکیل کو آئندہ سماعت پر جواب جمع کرانے کی ہدایت کی گئی ہے۔