پاکستان اسٹاک ایکسچینج میں کاروباری ہفتے کے آغاز پر زبردست مثبت رجحان دیکھنے میں آیا، جہاں سرمایہ کاروں کا اعتماد بحال ہونے سے 100 انڈیکس میں 900 پوائنٹس سے زائد کا نمایاں اضافہ ریکارڈ کیا گیا۔

کاروبار کے دوران ہنڈریڈ انڈیکس 1 لاکھ 18 ہزار 200 پوائنٹس کی سطح پر پہنچ گیا، مہنگائی میں کمی اور شرح سود میں ممکنہ کمی کی امیدوں کے باعث سرمایہ کاروں کی دلچسپی میں اضافہ ہوا ہے۔

تجزیہ کاروں کے مطابق اگر موجودہ معاشی پالیسیوں کا تسلسل جاری رہا تو اسٹاک مارکیٹ مستقبل قریب میں مزید بہتری کی جانب گامزن ہو سکتی ہے۔

واضح رہے کہ گزشتہ کاروباری ہفتے کے آخری روز سٹاک مارکیٹ میں ہنڈرڈ انڈیکس 414 پوائنٹس اضافے کیساتھ ایک لاکھ 17 ہزار 315 پوائنٹس کی سطح پر بند ہوا تھا۔

دوسری جانب انٹر بینک میں امریکی کرنسی 8 پیسے مہنگی ہوئی، جس سے ڈالر 280.72 روپے سے بڑھ کر 280.80 روپے پر پہنچ گیا۔