پاکستان ویمن کرکٹ ٹیم نے آئی سی سی ویمن ورلڈ کپ کوالیفائر کے آخری میچ میں بھی کامیابی حاصل کرلیا، قومی ویمن ٹیم نے بنگلادیش ویمن ٹیم کو 7 وکٹوں سے شکست دے دی۔ اس طرح قومی ٹیم ایونٹ میں ناقابلِ شکست رہی۔

لاہور میں کھیلے گئے ورلڈ کپ کوالیفائر کے اس میچ میں بنگلادیش ویمن نے پہلے کھیلتے ہوئے 9 وکٹوں پر 178 رنز بنائے۔ پاکستان ویمن نے ہدف 40ویں اوور میں حاصل کرلیا۔

بنگلہ دیش کی جانب سے ریٹو مونی 48 اور فہیمہ خاتون 44 رنز بنا کر نمایاں رہیں۔ پاکستانی بولر سعدیہ اقبال نے 3، فاطمہ ثناء اور ڈیانا بیگ نے 2-2 وکٹیں حاصل کیں۔

جواب میں پاکستان نے مطلوبہ ہدف تین وکٹوں کے نقصان پر پورا کرلیا. منیبہ علی نے 69، عالیہ ریاض نے ناٹ آوٹ 52 اور سدرہ امین 37 رنز بنا کر نمایاں رہیں۔ پاکستان وومن ٹیم کی کوالیفائر میں یہ مسلسل پانچویں فتح تھی۔

پاکستان نے ناقابل شکست رہتے ہوئے رواں برس بھارت میں ہونے والے ورلڈ کپ کیلئے رسائی حاصل کرلی ہے۔