راولپنڈی کی ڈسٹرکٹ کورٹ میں عالیہ حمزہ سمیت پی ٹی آئی کے 5 کارکنان کے خلاف درج مقدمہ کی سماعت کے دوران عدالت نےعالیہ حمزہ، عادل اور نعمان کو جوڈیشل ریمانڈ پرجیل بھیجنے کا حکم دے دیا۔

راولپنڈی کی سیشن عدالت نے پی ٹی آئی رہنما عالیہ حمزہ کیخلاف مقدمے کا محفوظ فیصلہ سناتے ہوئے عالیہ حمزہ کو جوڈیشل ریمانڈ پرجیل بھجوا دیا۔

ملزمان کو سول جج ممتاز ہنجرا کی عدالت میں پیش کیا گیا، پولیس نے عالیہ حمزہ کو جوڈیشل ریمانڈ جبکہ پی ٹی آئی کارکن شمیم آفتاب اوران کے ڈرائیورکو مقدمے سے ڈسچارج کرنے کی استدعا کی۔

سماعت کے دوران عدالت نے استدعا منظور کرتے ہوئے عالیہ حمزہ، عادل اورنعمان کو جوڈیشل ریمانڈ پر جیل بھجوا دیا جبکہ شمیم آفتاب اوران کے ڈرائیورمحمد زاہد کو مقدمہ سے ڈسچارج کردیا۔

عدالت نے دونوں ملزمان کو 25 ہزار روپے مالیت کے الگ الگ ضمانتی مچلکے داخل کرانے کی ہدایت کی۔

وکلاء صفائی نے عالیہ حمزہ کی درخواست ضمانت دائر کر دی۔ عالیہ حمزہ کی درخواست ضمانت عدالت نے سماعت کیلئے منظور کرلی۔

عالیہ حمزہ کے وکیل فیصل ملک اور علی عمران شہزاد نے ابتدائی دلائل دیے، وکلا صفائی نے کہا کہ الزام ایک طرح کا ہے تو تین ملزمان کو جوڈیشل اور دو کی ضمانت کیسے ہوسکتی ہے۔

وکلا صفائی نے کہا کہ عدالت پانچوں ملزمان کو ایک طرح ٹریٹ کرے، عدالتی عملے نے پہلے دو ملزمان کو ڈسچارج کرنے کا کہا۔ اب عدالتی عملے نے کہا پانچوں ملزمان کو جوڈیشل کر کے دو کی ضمانت ہو چکی ہے۔

عالیہ حمزہ کی درخواست ضمانت پرعدالت نے 22 اپریل کو سماعت مقرر کر دی، عدالت نے تفتیشی آفیسر سے 3 مئی کو مقدمے کی تفتیشی رپورٹ طلب کر لی۔

بعدازاں، پی ٹی آئی رہنما عالیہ حمزہ کو جہلم جیل منتقل کر دیا گیا، خواتین بیرک میں جگہ نہ ہونے پرعالیہ حمزہ کو جہلم بھجوایا گیا۔

واضح رہے کہ پولیس نے پی ٹی آئی رہنما عالیہ حمزہ کو گذشتہ رات راولپنڈی میں وومن کنونشن سے گرفتار کیا تھا، عالیہ حمزہ کے ہمراہ شمیم آفتاب کو بھی گرفتار کیا گیا۔