حکومت پاکستان کی خصوصی ہدایت پر پاک فضائیہ کے ایک سی 130 طیارے نے ایران کے شہر زاہدان سے 8 پاکستانی شہریوں کی میتیں بہاولپور پہنچا دیں گئیں۔ تمام جاں بحق افراد کا تعلق ضلع بہاولپور سے تھا، جو ایران کے صوبہ سیستان بلوچستان میں ایک دہشت گردی کے المناک واقعہ کا شکار ہوئے۔

آئی ایس پی آر کے مطابق ضروری قانونی کارروائی کی تکمیل کے بعد میتیں زاہدان میں پاکستان کے قونصل جنرل کے حوالے کی گئیں اور بعد ازاں آج علی الصبح پاکستان واپس پہنچا دی گئی۔

آئی ایس پی آر کے مطابق بہاولپور ایئرپورٹ پہنچنے پر مرحومین کے لواحقین نے میتیں وصول کیں، اس موقع پر سول اور فوجی حکام نے سوگوار خاندانوں سے تعزیت کی۔

ایران میں 8 پاکستانی مزدوروں کا بہیمانہ قتل، لاشوں کی واپسی میں 8 سے 10 دن لگنے کا امکان

ایران میں قتل 8 پاکستانیوں کی نماز جنازہ پاکستان میں ادا کردی گئی

ترجمان کے مطابق مسلح افواج دکھ کی اس گھڑی میں قوم کے ساتھ کھڑی ہیں اور ہر قسم کی دہشت گردی کے خلاف اپنے غیر متزلزل عزم کا اعادہ کرتی ہیں۔

آئی ایس پی آر کے مطابق چیئرمین جوائنٹ چیفس آف اسٹاف کمیٹی اور سروسز چیفس نے اس المناک واقعہ پر گہرے دکھ کا اظہار کیا اور متاثرین کے اہل خانہ سے دلی تعزیت کا اظہار کیا اور ان کے لئے اس ناقابل تلافی نقصان کو برداشت کرنے کی طاقت، صبر اور استقامت کی دعا کی ہے۔