خیبرپختونخوا حکومت کی جانب سے اعلان کردہ رمضان پیکج کی تقسیم میں تاحال تاخیر برقرار ہے، جس کے باعث صوبے کے دو لاکھ سے زائد مستحق افراد اب بھی اس مالی امداد سے محروم ہیں۔ عید کو گزرے تین ہفتے ہوچکے ہیں، مگر رمضان کے لیے مختص 10 ہزار روپے کا پیکج اب تک مکمل طور پر تقسیم نہیں ہو سکا۔

سوشل ویلفیئر کے حکام کے مطابق حکومت نے رواں سال 10 لاکھ 16 ہزار 395 خاندانوں کو 10 ہزار روپے فی کس کے حساب سے رمضان پیکج دینے کا اعلان کیا تھا۔ تاہم فہرستوں میں شامل ہزاروں افراد کے نام، شناختی کارڈ نمبرز اور دیگر معلومات میں فرق کی وجہ سے یہ پیکج بروقت تقسیم نہیں ہو سکا۔

سوشل ویلفیئر حکام کا کہنا ہے کہ اب تک 8 لاکھ 5 ہزار مستحقین کو رمضان پیکج فراہم کیا جا چکا ہے، جب کہ باقی افراد کو امداد دینے کا عمل جاری ہے۔

وزیر برائے سوشل ویلفیئر قاسم علی شاہ نے تکنیکی مسائل کے باعث تاخیر کا اعتراف کرتے ہوئے کہا ہے کہ جن افراد کو تاحال 10 ہزار روپے کی امداد نہیں مل سکی، ان کا ڈیٹا درست کرنے پر کام جاری ہے۔ انہوں نے وضاحت کی کہ رمضان کے دوران 8 لاکھ افراد کو امداد فراہم کی جا چکی ہے، جبکہ باقی رہ جانے والے مستحقین کی فہرستوں میں تصحیح کے بعد جلد رقم جاری کی جائے گی۔

عوامی حلقوں کی جانب سے اس تاخیر پر تشویش کا اظہار کیا جا رہا ہے اور مطالبہ کیا جا رہا ہے کہ رمضان کی بابرکت گھڑیوں کے بعد بھی مستحقین کی امداد میں تاخیر افسوسناک ہے، جسے فوری طور پر دور کیا جائے۔