فیصل آباد کی تاجر برادری کی جانب سے فلسطینی عوام سے اظہارِ یکجہتی کے لیے آج مکمل شٹر ڈاؤن ہڑتال جاری ہے۔ شہر کی تمام چھوٹی بڑی مارکیٹس بند ہیں اور کاروباری سرگرمیاں مکمل طور پر معطل ہیں۔

تاجر برادری نے غزہ میں نہتے فلسطینیوں پر ڈھائے جانے والے مظالم، انسانی حقوق کی سنگین خلاف ورزیوں اور جنگ بندی معاہدے کی پامالی پر شدید ردِعمل ظاہر کرتے ہوئے پرامن احتجاج کا راستہ اختیار کیا ہے۔

تاجر تنظیموں کا کہنا ہے کہ غزہ میں نہتے مسلمانوں پر بے رحمانہ مظالم اور بمباری قابلِ مذمت ہے۔ فلسطینیوں کی نسل کشی، انسانی حقوق کی سنگین پامالی اور جنگ بندی معاہدے کی مسلسل خلاف ورزی نے عالمی ضمیر کو جھنجھوڑ کر رکھ دیا ہے۔

تاجر رہنماؤں کا کہنا ہے کہ آج کی ہڑتال صرف ایک علامتی احتجاج نہیں بلکہ یہ پیغام ہے کہ پاکستانی عوام ظلم کے خلاف اور مظلوموں کے ساتھ کھڑی ہے۔

انہوں نے عالمی برادری اور حکومتِ پاکستان سے مطالبہ کیا ہے کہ وہ فلسطینیوں پر ہونے والے ظلم و ستم کے خلاف مؤثر آواز اٹھائیں اور مظلوموں کو انصاف دلوانے میں اپنا کردار ادا کریں۔