بلوچستان کی ساحلی پٹی پر رہنے والے عوام کی فلاح و بہبود کے لیے پاک بحریہ نے ایک اور اہم سنگِ میل عبور کر لیا۔ پاک بحریہ کے اسپتال پی این ایس درمان جاہ میں جدید سہولیات سے آراستہ نئے بلاک کا افتتاح کر دیا گیا۔

آئی ایس پی آر کے مطابق، افتتاحی تقریب کے مہمانِ خصوصی چیف آف دی نیول اسٹاف ایڈمرل نوید اشرف تھے۔ نو تعمیر شدہ بلاک میں جدید آپریشن تھیٹر کمپلیکس، آئی سی یو، گائنی یونٹ، شعبۂ اطفال اور نوزائیدہ بچوں کے لیے نیونٹل آئی سی یو شامل ہے۔

اس موقع پر امیر البحر ایڈمرل نوید اشرف نے کہا کہ ”پی این ایس درمان جاہ جدید طبی سہولیات کے ساتھ مقامی افراد کی خدمت جاری رکھے گا۔ پاک بحریہ، بحری سرحدوں کے دفاع کے ساتھ ساتھ ساحلی عوام کی فلاح و بہبود کے لیے اپنے تمام وسائل بروئے کار لاتی رہے گی۔“

تقریب میں اعلیٰ سول و عسکری حکام اور مقامی معززین نے بھی شرکت کی۔