سنگاپور میں ایک خاتون ملازمہ نے نوکری سے استعفیٰ دینے کا انوکھا انداز اپنایا، جو انٹرنیٹ پر وائرل ہوگیا۔ خاتون نے اپنا استعفیٰ ٹوائلٹ پیپر پر لکھ کر اپنے باس کو دیا، جس کے پیچھے ایک گہرا پیغام تھا۔

سنگاپور کی ایک کمپنی ڈائریکٹر اینجلا یوہ نے یہ واقعہ لنکڈ ان پر شیئر کیا۔ انہوں نے بتایا کہ خاتون ملازمہ نے ہاتھ سے لکھے گئے ایک نوٹ میں کہا، ’میں نے استعفے کے لیے اس قسم کے کاغذ کا انتخاب اس علامت کے طور پر کیا ہے کہ کمپنی نے میرے ساتھ کیسا برتاؤ کیا۔ میں استعفیٰ دے رہی ہوں۔‘

نوٹ میں مزید لکھا گیا ، ’مجھے لگا کہ میں بھی ایک ٹوائلٹ پیپر کی طرح ہوں — ضرورت کے وقت استعمال کیا گیا اور پھر بغیر کسی خیال کے پھینک دیا گیا۔‘

یہ جرات مندانہ قدم سوشل میڈیا پر تیزی سے وائرل ہوگیا۔ بہت سے صارفین نے ملازمہ کے اس احتجاج کو سراہا اور کہا کہ اس نے واضح انداز میں اپنی بے قدری پر آواز بلند کی۔

ایک صارف نے نوٹ کی تصویر شیئر کرتے ہوئے لکھا، ’براہ کرم، اپنے ملازمین کے ساتھ ہمیشہ عزت سے پیش آئیں۔‘

متعدد افراد نے اس قدم کو تخلیقی اور پراثر قرار دیا اور کہا کہ اس پیغام سے وہ لوگ خود کو جڑا ہوا محسوس کرتے ہیں جو اپنی ملازمتوں میں نظر انداز یا بے عزت کیے جانے کا سامنا کرتے ہیں۔

کمپنی کی ڈائریکٹر اینجلا یوہ نے کہا کہ اس واقعے نے انہیں گہرے اثر میں لیا ہے اور یاد دلایا ہے کہ ملازمین کے ساتھ ہمدردی اور انصاف کے ساتھ پیش آنا کتنا ضروری ہے۔

یہ استعفیٰ اب سوشل میڈیا پر کام کی جگہ پر عزت نفس، ذہنی صحت، اور بہتر ورک کلچر کی ضرورت پر ایک وسیع بحث کو جنم دے چکا ہے۔