کے پی حکومت کے افغانستان سے مذاکرات پردفترخارجہ کا ردِ عمل سامنے آیا ہے، ترجمان دفترخارجہ نے کہا کہ ٹی او آرز بھجوانے کا معاملہ چیک کریں گے۔

ترجمان دفترخارجہ کی ہفتہ وار بریفنگ دیتے ہوئے ترجمان دفتر خارجہ شفقت علی خان کا کہنا ہے کہ کے پی حکومت کے افغانستان سے مذاکرات کے ٹی او آرز دفتر خارجہ کو بھجوانے کا معاملہ چیک کریں گے۔ نائب وزیراعظم کا امریکی وزیرخارجہ سے ٹیلیفونک رابطہ ہوا۔

ترجمان دفترخارجہ کے مطابق افغانستان میں چھوڑے گئے جدید امریکی ہتھیاروں کے معاملے پر بھی بات چیت ہوئی ہے ، شفقت علی خان کا کہنا تھا امریکا کی جانب سے ٹیرف تبدیلی کے معاملے کو دیکھ رہے ہیں۔

شفقت علی خان نے بریفنگ میں یہ بھی کہا کہ تعلیمی ویزوں کی معطلی پر امریکا سے رابطے میں ہیں ، متحدہ عرب امارات میں پاکستانی ویزوں پر مکمل پابندی نہیں ہے۔ بھارت میں اوقاف قوانین میں تبدیلی ایک امتیازی سلوک اور اقلیتوں کے حقوق کی خلاف ورزی ہے۔

پاکستانی طلباء کے لیے گلوبل انڈرگریجویٹ ایکسچینج پروگرام کے خاتمے کے حوالے سے ترجمان نے کہا کہ اس فیصلے سے ایک ایسے 15 سالہ تعاون کا اختتام ہوا ہے جس نے تعلیمی اور ثقافتی روابط کے فروغ میں کلیدی کردار ادا کیا، اور تعلیم، سائنس و ٹیکنالوجی اور عوامی سطح پر روابط کو مرکز بناتے ہوئے دو طرفہ تعلقات کو مضبوط بنانے میں مدد دی۔