پاکستان پیپلز پارٹی (پی پی پی) کے سینئر رہنما تاج حیدر مختصر علالت کے بعد انتقال کرگئے۔ تاج حیدر 83 برس کے تھے۔

اہل خانہ کے مطابق پیپلز پارٹی کے رہنما تاج حیدر مقامی اسپتال میں زیر علاج تھے۔ ان کی نمازجنازہ 9 اپریل کو بعد نماز ظہرین مسجد و امام بارگاہ یثرب فیز 4 ڈیفنس سوسائٹی میں ادا کی جائے گی۔

سینیٹرتاض حیدر 8 مارچ 1942 کو کوٹہ راجستھان کے علمی گھرانے میں پیدا ہوئے۔ تاج حیدر نے ابتدائی تعلیم گورنمنٹ بوائز ہائی اسکول رنچھوڑ لائن کراچی سے حاصل کی۔

تاج حیدر فنونِ لطیفہ کے میدان میں آئے اور ٹیلی وژن کے لیے بھی لکھا، تاج حیدر نے اپنے ڈرامہ سیریل آبلہ پا میں پروفیسر آڈی والا کا کردار ادا کیا تھا۔ تاج حیدر نے مختلف اخبارات میں کالم بھی لکھے۔

تاج حیدر نے 1967 کے سوشلسٹ کنونشن میں شرکت کی، 1967 میں باقاعدہ طور پر پاکستان پیپلز پارٹی میں شمولیت اختیار کی۔ تاج حیدر کا شمار پاکستان پیپلز پارٹی کے بانی اراکین میں ہوتا تھا۔

تاج حیدر کو 2012 میں ستارہ امتیاز برائے سائنسی خدمات دیا گیا۔ 2006 میں انہیں تیرھواں پی ٹی وی ایوارڈ برائے مصنف بہترین ڈرامہ سیریل بھی دیا گیا۔

صدر مملکت، وزیراعظم اور بلاول بھتو کا تاج حیدر کے انتقال پر اظہار افسوس

صدر مملکت آصف زرداری نے سینئر رہنما پیپلز پارٹی کے انتقال پر اظہار افسوس کرتے ہوئے تاج حیدرکی پیپلزپارٹی اور جمہوریت کے لیے خدمات کو خراج عقیدت پیش کیا ہے۔

صدرآصف زرداری کا کہنا تھا کہ مرحوم تاج حیدر پاکستان پیپلز پارٹی کا اہم اثاثہ تھے، وہ پیپلزپارٹی کے نظریاتی کارکنوں میں سے ایک تھے، تاج حیدرکی وفات سے پیپلزپارٹی اہم سیاسی رہنما سے محروم ہوگئی۔

وزیراعظم شہباز شریف نے پیپلزپارٹی کے بانی رکن تاج حیدر کے انتقال پر اظہار افسوس کرتے ہوئے کہا کہ تاج حیدر کی وفات سے پاکستان اہم سیاسی رہنما سے محروم ہوگیا۔

چیئرمین پیپلز پارٹی بلاول بھٹو زرداری نے تاج حیدرکے انتقال پر اظہار افسوس کرتے ہوئے کہا ہےکہ سینیٹر تاج حیدرکی سیاسی، سماجی اور ادبی خدمات کو فراموش نہیں کیا جاسکتا، تاج حیدر تہذیب اور شائستگی کا ایک باوقار پیکر اور ایک تخلیقی ذہن کے مالک تھے۔

بلاول بھٹو زرداری کا کہنا تھا کہ تاج حیدرپاکستانی سیاست میں شعور اور دانش کی ایک شناخت تھے، تاج حیدرکے انتقال سے دلی دکھ اور صدمہ ہوا۔

وزیراعلیٰ سندھ سید مراد علی شاہ نے تاج حیدر کے انتقال پر اظہار افسوس کرتے ہوئےکہا ہےکہ تاج حیدر کی وفات سے مجھ سمیت تمام کارکنان کو دلی صدمہ پہنچا، تاج حیدر زیرک، مدبر اور سلجھے ہوئے سیاسی رہنما تھے، تاج حیدر نے ہمیشہ جمہوریت اور عوامی خدمت کے لیے جدوجہد کی۔

وزیر بلدیات نے اپنے پیغام میں کہا کہ مرحوم سینیٹر تاج حیدر کے انتقال سے پاکستان پیپلز پارٹی ایک اہم اثاثے سے محروم ہوگئی ہے اور ان کا خلا کبھی پورا نہیں کیا جاسکتا۔ اللہ تعالٰی مرحوم تاج حیدر کی مغفرت فرمائے اور انہیں اپنی جوار رحمت میں اعلٰی مقام عطا فرمائے۔

رہنما پیپلز پارٹی وقار مہدی کا کہنا ہے کہ تاج حیدر ہمارے دیرینہ ساتھی اور بہترین سیاسی کارکن تھے، تاج حیدرپیپلز پارٹی کے بنیادی و نظریاتی کارکنان میں سے ایک تھے، ان کی سیاسی خدمات کو فراموش نہیں کیا جاسکتا۔