پاکستان اسٹاک ایکس چینج پر چھائے مندی کے بادل چھٹ گئے، گزشتہ روز کی بدترین مندی کے بعد 100 انڈیکس میں 1500 پوائنٹس سے زائد اضافے کے بعد ایک لاکھ 16 ہزار کی حد بحال ہوگئی۔

پاکستان اسٹاک مارکیٹ گزشتہ روز کی شدید مندی کے بعد آج بحالی کی جانب گامزن ہے، کاروباری ہفتے کے دوسرے روز کاروبار کا مثبت آغاز ہوا، جہاں کاروبار کے دوران 100 انڈیکس میں 1700 سے زائد پوائنٹس کا اضافہ ریکارڈ کیا گیا۔

پاکستان اسٹاک مارکیٹ میں 100 انڈیکس ایک لاکھ 16 ہزار 600 پوائنٹس پر پہنچ گیا، مارکیٹ میں مزید بہتری کے لیے سرمایہ کار پُرامید ہیں۔

واضح رہے کہ امریکی ٹیرف کے بعد گزشتہ روز پاکستان سمیت دنیا بھی کی اسٹاک مارکیٹس کریش کر گئی تھیں جس کے نتیجے میں کھربوں ڈالر کا نقصان ہوا تھا۔

گزشتہ روز امریکی صدر ڈونلڈ ٹرمپ کے ٹیرف کے نفاذ کے جواب میں چین کی جانب سے امریکا پر بھاری محصولات عائد کیے جانے کے بعد عالمی تجارتی جنگ کے خدشات کے پیش نظر پاکستان اسٹاک ایکسچینج میں کے ایس ایس 100 انڈیکس میں 3 ہزار 882 پوائنٹس کی کمی ریکارڈ کی گئی تھی۔

شدید مندی کی وجہ سے کاروبار 45 منٹ کے لیے روکنا پڑا تھا، کاروباری دن کے اختتام پر ہنڈرڈ انڈیکس ایک لاکھ 14 ہزار 909 پوائنٹس پر بند ہوا تھا۔

دوسری جانب انٹر بینک میں ڈالر کی قیمت میں معمولی کمی ریکارڈ کی گئی ہے ، ایکسچینج کمپنیز ایسوسی ایشن کے مطابق 10 پیسے سستا ہونے کے بعد انٹر بینک میں ڈالر کی قیمت 280 روپے 50 پیسے کا ہو گیا ہے۔