رات کے سناٹے میں جب سب لوگ سکون کی نیند سو رہے تھے، گجرات کے ضلع امریلی کے ایک گھر میں ایسا ناقابلِ یقین واقعہ پیش آیا جس نے اہلِ خانہ کے ہوش اڑا دیے۔ یہ واقعہ ملک کے جنگلی حیات سے قریبی تعلق اور بڑھتی ہوئی انسانی آبادی کے درمیان ٹکراؤ کی ایک مثال بھی ہے۔

ملو بھائی رام بھائی لکنوترا کا خاندان اپنے گھر میں محوِ خواب تھا جب اچانک ایک شیر چھت کے راستے سے گھر میں داخل ہو گیا۔ شیر سیدھا کچن کی دیوار پر جا بیٹھا اور وہاں دو گھنٹے تک موجود رہا۔ جب اہلِ خانہ کی آنکھ کھلی تو سامنے شیر کو دیکھ کر ان کے قدموں تلے زمین نکل گئی۔ خوف کے مارے سب لوگ گھر سے باہر بھاگے اور مدد کے لیے چیخنے لگے۔

پارک ملازم نے جان بوجھ کر شیر کا پنجرہ کھول دیا، حکام کی دوڑیں لگ گئیں

اہلِ خانہ کی آواز سن کر دیہاتی مدد کو دوڑے۔ انہوں نے مشعلیں جلائیں، روشنی ڈالی اور آوازیں نکال کر شیر کو خوفزدہ کرنے کی کوشش کی۔ بالآخر دو گھنٹے کی کوشش کے بعد شیر کو وہاں سے بھگا دیا گیا۔ خوش قسمتی سے کوئی جانی نقصان نہیں ہوا۔

اس واقعے کی ویڈیو سوشل میڈیا پر وائرل ہو چکی ہے، جس میں شیر دیوار پر بیٹھا کچن سے جھانک رہا ہے۔ ایک دیہاتی اس پر ٹارچ کی روشنی ڈالتا ہے تو شیر براہِ راست کیمرے میں دیکھتا ہے، اس کی چمکتی آنکھیں رات کی تاریکی میں ایک خوفناک منظر پیش کرتی ہیں۔

یہ پہلا موقع نہیں جب گجرات کے رہائشی علاقوں میں شیر دیکھا گیا ہو۔ رواں سال فروری میں بھی بھاونگر-سومنات ہائی وے پر ایک ایشیائی شیر کی موجودگی نے ٹریفک کو روک دیا تھا۔ گاڑیاں، موٹر سائیکلیں اور ٹرک شیر کے گزرنے کا انتظار کرتے رہے، اور ایک ویڈیو میں دیکھا جا سکتا ہے کہ شیر کس وقار سے پل عبور کر رہا ہے۔

پنجاب میں شیر، چیتا اور تیندوا رکھنے والوں کو 30 دن میں جانوروں کو ڈیکلئیر کرنے کا حکم

ان واقعات سے یہ واضح ہوتا ہے کہ جنگلی حیات کی پناہ گاہوں اور انسانی بستیوں کے درمیان حدِ فاصل کم ہو رہی ہے۔ حکومت اور عوام دونوں کو مل کر ایسے واقعات کی روک تھام کے لیے اقدامات کرنے ہوں گے تاکہ نہ انسانوں کی جان خطرے میں پڑے اور نہ ہی جنگلی جانوروں کو نقصان ہو۔