پاکستان کی مشہور اداکارہ اور ٹک ٹاکر دنانیر مبین نے اداکار احد رضا میر سے شادی کی افواہوں پر خاموشی توڑتے ہوئے واضح کیا ہے کہ ان کے درمیان کوئی ایسا رشتہ نہیں ہے۔

دنانیر اور احد رضا میر اس وقت اپنے کامیاب ڈرامے ”میم سے محبت“ کی وجہ سے خبروں میں ہیں، اور اس ڈرامے میں ان کی کیمسٹری کو دیکھ کر مداحوں نے انہیں حقیقی زندگی میں بھی ایک جوڑی سمجھنا شروع کر دیا ہے۔

عینا آصف بھی ’ڈیپ فیک‘ ویڈیو کا نشانہ بن گئیں

حال ہی میں دنانیر نے گریجویشن مکمل کیا تھا، جس پر احد رضا میر کے والد سینئر اداکار آصف رضا میر نے انہیں مٹھائی کا ٹوکرا تحفے میں دیا۔

اسی دوران احد رضا میر نے ڈرامے کے سیٹ پر دنانیر کو نوٹوں کا ہار پہنایا، جس کی ویڈیو سوشل میڈیا پر وائرل ہو گئی اور لوگوں نے اسے ان کے رشتہ پکا ہونے کا جشن سمجھ لیا۔

اب دنانیر مبین نے ایک انٹرویو میں وضاحت دیتے ہوئے کہا کہ وہ اور احد رضا میر صرف گریجویشن کے چھوٹے سے جشن میں شریک تھے۔

دنانیر نے بتایا کہ احد رضا میر کی والدہ نے بھی ان کے لیے گھر سے گوشت پکا کر بھیجا تھا اور ان کے والد آصف رضا میر نے سیٹ پر انہیں ہار پہنایا تھا۔

دنانیر کا مزید کہنا تھا کہ وہ ایک اداکارہ ہیں اور ان کے کردار کو مداحوں کی طرف سے پسند کرنا خوشی کی بات ہے، لیکن وہ چاہتی ہیں کہ لوگ ان کی ذاتی زندگی کو ان کی آن اسکرین جوڑیوں سے الگ رکھیں۔

انہوں نے یہ بھی کہا کہ ناظرین کو سمجھنا چاہیے کہ وہ جو کردار ادا کر رہی ہیں وہ ان کی اصل زندگی سے بہت مختلف ہے، اور انہیں اپنی ذاتی زندگی میں خلل ڈالے بغیر ان کی اداکاری کا احترام کرنا چاہیے۔